Communism

Stretched Background Image

ഈ തിരിച്ചറിവ്‌ നല്ലതു തന്നെ.......................................

മതകീയാധിപത്യത്തിന്റെ അഥവാ പൗരോഹിത്യ ഭരണത്തിന്റെ കീഴില്‍ ഞെരിഞ്ഞമര്‍ന്ന സമൂഹത്തില്‍ സ്വതന്ത്രചിന്ത മുരടിക്കുകയും ശാസ്‌ത്രബോധം മതവിരുദ്ധമായി ഗണിക്കപ്പെടുകയും ചെയ്‌ത ഒരു പ്രത്യേക സാഹചര്യത്തിലാണ്‌ കാള്‍മാര്‍ക്‌സ്‌, ഫ്രഡറിക്‌ ഏംഗല്‍സ്‌ തുടങ്ങിയ ചിന്തകന്മാര്‍ കമ്യൂണിസ്റ്റ്‌ ചിന്തകള്‍ആവിഷ്‌കരിക്കുന്നത്‌................ .. .. യൂറോപ്പില്‍ ചര്‍ച്ചിന്റെ മേധാവിത്വത്തിനപ്പുറം ഒന്നും ചിന്തിക്കാന്‍ കഴിയാത്ത, ഗലീലിയോ തുടങ്ങിയ വിശ്വവിഖ്യാത ശാസ്‌ത്രജ്ഞന്മാര്‍ക്കു പോലും ദുരന്തമേറ്റുവാങ്ങേണ്ടി വന്ന ആ പശ്ചാത്തലത്തില്‍ മതനിരാസം പുരോഗമനാശയമായി കണ്ടെങ്കില്‍ അത്‌ സാഹചര്യത്തിന്റെ തേട്ടം മാത്രമാണ്‌. .. ഡാര്‍വിന്‍ എന്ന ചിന്തകന്റെ പരിണാമവാദം മാര്‍ക്‌സിയന്‍ രാഷ്‌ട്രീയ ചിന്തക്ക്‌ വളമേകി. ദൈവത്തിന്റെ സൃഷ്‌ടിയാണ്‌ മനുഷ്യന്‍, പ്രപഞ്ചം എന്നിത്യാദി മതകീയ `സങ്കല്‌പങ്ങളെ' പാടെ പരിത്യജിച്ചുകൊണ്ട്‌ പദാര്‍ഥവാദവും പ്രപഞ്ചം സ്വയംഭൂവാണെന്ന സിദ്ധാന്തവും ഭൂമിയില്‍ യാദൃച്ഛികമായി ഉണ്ടായ ഏകകോശ ജീവികള്‍ യുഗാന്തരങ്ങളിലൂടെ പരിണമിച്ച്‌ കുരങ്ങിന്റെ പിന്‍ഗാമിയായി മനുഷ്യനെന്ന `മൃഗം' രൂപം പ്രാപിച്ചു എന്നെല്ലാമുള്ള ഭൗതികവാദത്തിന്‌ കമ്യൂണിസത്തിന്റെ രാഷ്‌ട്രീയ മുഖംമൂടി കൂടി ആയപ്പോള്‍ മതനിരാസത്തിന്റെ പാതയില്‍ നീങ്ങാന്‍ ആളുകള്‍ ഏറെയുണ്ടായി.

വൈരുധ്യാത്മക ഭൗതികവാദവും കമ്യൂണിസവും തോളുചേര്‍ന്ന്‌ മുന്നേറി. സ്റ്റാലിന്‍, ലെനിന്‍, മാവെ സേതൂംഗ്‌ തുടങ്ങിയവരിലൂടെ കമ്യൂണിസ്റ്റ്‌ ആധിപത്യവും കൂടി രംഗത്തു വന്നപ്പോള്‍ മതവിശ്വാസികള്‍ക്ക്‌ അതൊരു വെല്ലുവിളിയായിത്തീര്‍ന്നു. ലോകത്തിന്റെ നിയന്ത്രണം കൈയിലൊതുക്കാവുന്നത്ര വന്‍ ശക്തിയായി സോഷ്യലിസ്റ്റ്‌ രാഷ്‌ട്രങ്ങള്‍ ആധിപത്യം നേടി. ലോകത്തിന്‌ അതുവരെ പരിചിതമല്ലാത്ത ഉരുക്കുമുഷ്‌ടിയും ഇരുമ്പുമറയുമായി ചൈനയും സോവിയറ്റ്‌ യൂണിയനും നിലകൊണ്ടു. പോളണ്ടും ക്യൂബയും മറ്റു ചില രാജ്യങ്ങളും ആ വഴിക്ക്‌ നീങ്ങി. കമ്യൂണിസം ഒരു പ്രസ്ഥാനമായി ലോകത്ത്‌ നിലവില്‍ വന്നു. ഇന്ത്യപോലുള്ള മതേതര ജനാധിപത്യ രാഷ്‌ട്രങ്ങളില്‍ കമ്യൂണിസ്റ്റ്‌ പാര്‍ട്ടികള്‍ രൂപീകരിക്കപ്പെട്ടു. ഇരുമ്പുമറയുള്ള ഭരണകൂടമില്ലെങ്കിലും കേഡര്‍ സ്വഭാവമുള്ള പാര്‍ട്ടി പ്രവര്‍ത്തനം അവര്‍ നടപ്പാക്കി. തോക്കിന്‍കുഴലിലൂടെ അധികാരം പിടിച്ചെടുത്ത റഷ്യ-ചൈന മാതൃക, വ്യത്യസ്‌തമായ സാമൂഹിക പശ്ചാത്തലവും പാരമ്പര്യവുമുള്ള ഭാരതത്തില്‍ നടപ്പിലാക്കാന്‍ കഴിയില്ലെന്ന്‌ തിരിച്ചറിഞ്ഞ ഇന്ത്യന്‍ കമ്യൂണിസ്റ്റുകള്‍ ജനാധിപത്യ പാര്‍ലമെന്ററി ലൈനിലേക്ക്‌ തങ്ങളറിയാതെ നീങ്ങിപ്പോയി; അഥവാ കാലം അവരെ അങ്ങോട്ടുനീക്കി. ലോകചരിത്രത്തിലാദ്യമായി ജനാധിപത്യരീതിയില്‍ ബാലറ്റ്‌ പേപ്പറിലൂടെ കമ്യൂണിസ്റ്റ്‌ പാര്‍ട്ടി അധികാരത്തിലേറിയത്‌, ഫെഡറല്‍ ഭരണസംവിധാനമുള്ള ഇന്ത്യാ മഹാരാജ്യത്തിന്റെ തെക്കേ അറ്റത്തുള്ള കേരളമെന്ന സംസ്ഥാനത്തിലായിരുന്നു (1957). തുടര്‍ന്നുള്ള ദശാബ്‌ദങ്ങളില്‍ പശ്ചിമബംഗാള്‍, ത്രിപുര, കേരളം എന്നീ സംസ്ഥാനങ്ങളില്‍ ഇടയ്‌ക്കിടെ ഭരണനേതൃത്വവും ഭരണപങ്കാളിത്തവും ഏറ്റെടുക്കാന്‍ കമ്യൂണിസ്റ്റ്‌ പാര്‍ട്ടിക്ക്‌ സാധിച്ചു. ജനാധിപത്യത്തിന്റെ നടുവില്‍ നിന്നുകൊണ്ട്‌ ഏകാധിപത്യത്തിന്റെ തനിസ്വരൂപം പുറത്തെടുത്ത കമ്യൂണിസ്റ്റുകള്‍ വടക്കോട്ട്‌ നോക്കി കാലം കഴിച്ചു. കമ്യൂണിസ്റ്റ്‌ രാഷ്‌ട്രങ്ങളെ `മാതൃഭൂമി'യായി കണ്ടു. ചോറിവിടെയും കൂറവിടെയുമാണെന്ന്‌ ലോകത്തെക്കൊണ്ട്‌ പറയിച്ചു. ഇരുമ്പുമറയുള്ള പാര്‍ട്ടി യോഗങ്ങളും ഉരുക്കുമുഷ്‌ടിയുള്ള പാര്‍ട്ടി നേതൃത്വവും കൃത്യമായ സ്റ്റഡിക്ലാസ്സുകളിലൂടെ സമ്മേളനവും പാര്‍ട്ടി കോണ്‍ഗ്രസും സെക്രട്ടറി ഭരണവുമായി `അവിടുത്തെ പോലെ ഇവിടെയും' കഴിഞ്ഞുകൂടി. നിരവധി കമ്യൂണിസ്റ്റ്‌ സൈദ്ധാന്തികന്മാര്‍ കേരളത്തിലുമുണ്ടായി. മാര്‍ക്‌സിയന്‍ തത്വശാസ്‌ത്രം ഉപജീവിച്ച്‌ ധാരാളം സാഹിത്യകൃതികള്‍ വിരചിതമായി. `ശാസ്‌ത്ര സാഹിത്യം' എന്ന ഒരു ശാഖ തന്നെ കമ്യൂണിസത്തിലേക്കും മതനിരാസത്തിലേക്കുമുള്ള പരോക്ഷപാതയായി നിലകൊണ്ടു. കാലം മാറി, കൃത്രിമത്വത്തിന്‌ ഏറെ പിടിച്ചുനില്‌ക്കാനാവില്ല. ഗ്ലാസ്‌ നോസ്റ്റും പെരിസ്‌ട്രോയിക്കയും വന്നു. ലോകത്തിലെ കമ്യൂണിസ്റ്റ്‌ സൗധങ്ങള്‍ ഒന്നൊന്നായി നിലംപൊത്തി. പ്രതിബിംബങ്ങള്‍ ഇന്നും നിലനില്‌ക്കുന്നു. ഇന്ത്യയില്‍ അനുരണനമുണ്ടായി. കേഡര്‍ പാര്‍ട്ടി, കേവല രാഷ്‌ട്രീയ പാര്‍ട്ടിയായി തരംതാണു. ഭരണലബ്‌ധി മിനിമം പരിപാടിയായി. സ്വന്തം സിദ്ധാന്തങ്ങള്‍ക്കപ്പുറം അഴിമതിയിലും പണക്കൊഴുപ്പിലും പാര്‍ട്ടി മുങ്ങിപ്പൊങ്ങി. ആദ്യകാല നേതാക്കളും സൈദ്ധാന്തികന്മാരും തങ്ങളുടെ പാരമ്പര്യ മതങ്ങളെ അന്യംനിര്‍ത്തി. തികഞ്ഞ നാസ്‌തികരായിത്തീരാന്‍ ശ്രമിച്ചു. അക്കാരണത്താല്‍ തന്നെ വിശ്വാസിസമൂഹം പൊതുവെ കമ്യൂണിസത്തില്‍ നിന്നകന്നു നിന്നു. പ്രത്യേകിച്ച്‌ മുസ്‌ലിംകളും ക്രൈസ്‌തവരും. കാലം മാറി, കമ്യൂണിസ്റ്റ്‌ അണികള്‍ മതവിശ്വാസത്തിലേക്ക്‌ തിരിച്ചുനടന്നു. കൃത്യമായി അമ്പലത്തില്‍ പോകുന്നവരും അഞ്ചുനേരം നമസ്‌കരിക്കുന്നവരും ഒറ്റപ്പെട്ടതെങ്കിലും കമ്യൂണിസത്തിന്‌ തലവേദനയായി; ചില നേതാക്കള്‍ ഇടക്കിടെ മതനിരാസമാണ്‌ കമ്യൂണിസത്തിന്റെ പ്രഖ്യാപിത നയമെന്ന്‌ ഓര്‍മപ്പെടുത്തി. അപ്പോള്‍ വിശ്വാസികളായ നേതാക്കള്‍ വിലങ്ങു തടിയായി; ചോദ്യചിഹ്നമായി. വീണ്ടും കരണംമറിഞ്ഞ പ്രസ്‌താവന വരും. കാലക്രമത്തില്‍ അണികള്‍ മാറി. പദാര്‍ഥവാദികളും നാസ്‌തികരുമായ കമ്യൂണിസ്റ്റ്‌ സമൂഹത്തെ ഇന്ത്യയില്‍ കാണാതായി. നേതൃത്വം അണികള്‍ക്കു പിന്നാലെ വന്നുകൊണ്ടിരുന്നു. മതവിശ്വാസവും കമ്യൂണിസവും എങ്ങനെ പൊരുത്തപ്പെടുമെന്ന്‌ ഇന്നും ചര്‍ച്ചകളില്‍ വരുന്നു. പേജുകളില്‍ ജീവിക്കുന്നു. ജനങ്ങള്‍ തങ്ങളുടെ വഴിയെ നീങ്ങുന്നു.

ഇപ്പോള്‍ ഇക്കാര്യം ഓര്‍മിക്കാന്‍ ഒരു പ്രത്യേക കാരണമുണ്ട്‌. കമ്യൂണിസ്റ്റ്‌ മാര്‍ക്‌സിസ്റ്റ്‌ പാര്‍ട്ടിയുടെ സംസ്ഥാന സമ്മേളനത്തോടനുബന്ധിച്ച്‌ നടന്ന പ്രദര്‍ശനത്തില്‍ ക്രിസ്‌തുവിന്റെ അവസാനത്തെ അത്താഴവും മറ്റും ചിത്രീകരിച്ചത്‌ പ്രദര്‍ശനത്തിനു വച്ചു. യഥാര്‍ഥത്തില്‍, പഴയ ക്രിസ്‌തുവിന്റെ ആറാം തിരുമുറിവും ഈയടുത്ത കാലത്തെ `നികൃഷ്‌ട ജീവി' പ്രയോഗവും മറ്റും വരുത്തിയ വിനകള്‍ മായ്‌ച്ചു കളയാനും മതസമൂഹങ്ങളെ പാര്‍ട്ടിയോടടുപ്പിക്കാനുമുള്ള തന്ത്രമെന്ന നിലയിലാണത്‌ ചെയ്‌തത്‌. വെളുക്കാന്‍ തേച്ചത്‌ പാണ്ടായി. ക്രിസ്‌തുവിനെ അവഹേളിച്ചുവെന്ന്‌ ആക്ഷേപം വന്നു. ഗത്യന്തരമില്ലാതെ നേതാക്കള്‍ക്ക്‌ ന്യായീകരിക്കേണ്ടി വന്നു. ക്രിസ്‌തു ഏറ്റവും മഹാനായ വിമോചകനായിരുന്നുവെന്ന്‌ പാര്‍ട്ടി സെക്രട്ടറി തന്നെ വിശദീകരിച്ചു. പലിശക്കാര്‍ക്കും അധാര്‍മിക വാണിഭക്കാര്‍ക്കുമെതിരെ ചാട്ടവാര്‍ ഉയര്‍ത്തി, തിന്മകള്‍ക്കെതിരെ പ്രവര്‍ത്തിച്ചതിന്‌ ക്രൂരമര്‍ദനം ഏല്‌ക്കേണ്ടി വന്ന ക്രിസ്‌തുവിന്റെ മഹത്വം അദ്ദേഹം എടുത്തുപറഞ്ഞു. പത്രലേഖകര്‍ തുടരെ ഉന്നയിച്ച ചോദ്യങ്ങള്‍ക്ക്‌ മറുപടിയായി മുഹമ്മദ്‌ നബിയുടെ കാരുണ്യവും മനുഷ്യസ്‌നേഹവും കമ്യൂണിസ്റ്റുകള്‍ അംഗീകരിക്കുന്നു എന്നും അദ്ദേഹം വ്യക്തമാക്കുകയുണ്ടായി.

കമ്യൂണിസത്തിന്റെ ചാലകശക്തിയായി സമാന്തരമായി നീങ്ങിയ യുക്തിവാദികള്‍ (ജോസഫ്‌ ഇടമറുക്‌, യു കലാനാഥന്‍ പോലുള്ളവര്‍) ക്രിസ്‌തു ജീവിച്ചിട്ടില്ല, കൃഷ്‌ണന്‍ ഒരു മിത്ത്‌, മുഹമ്മദ്‌ നബി മനോരോഗി എന്നിങ്ങനെ മതാചാര്യരെയും ദൈവദൂതരെന്ന്‌ വിശ്വാസികള്‍ അംഗീകരിക്കുന്ന മഹത്തുക്കളെയും ഇകഴ്‌ത്താനും ഭത്സിക്കാനും മാത്രം പഠിപ്പിക്കപ്പെട്ട പാര്‍ട്ടി വൃത്തങ്ങളില്‍ നിന്ന്‌ ആ മഹാന്മാരുടെ ത്യാഗത്തെയും മാനവിക സമീപനങ്ങളെയും അംഗീകരിക്കേണ്ടി വന്ന സാഹചര്യത്തെക്കൂടി വിലയിരുത്തുന്നത്‌ നല്ലതാണ്‌. ചര്‍ച്ചിന്റെ അപമാനവീകരണ പ്രവണതകളില്‍ നിന്നാണ്‌ മതവിരുദ്ധാശയം ഉടലെടുക്കുന്നതെങ്കിലും ക്രിസ്‌തുമത സമൂഹത്തിലെ മുക്കാലേ മുണ്ടാണിയും മതകീയമായിത്തന്നെ മുന്നേറി. കാള്‍ മാര്‍ക്‌സോ ഏംഗല്‍സോ മറ്റാരെങ്കിലുമോ നേര്‍ക്കുനേരെ സൈദ്ധാന്തികമായി ഏറ്റുമുട്ടാത്ത വിശുദ്ധ ഖുര്‍ആനും ഇസ്‌ലാമികാര്‍ശങ്ങളും പ്രമാണമായംഗീകരിക്കുന്ന മുസ്‌ലിംസമൂഹം കമ്യൂണിസവുമായി അകന്നു തന്നെയാണ്‌ നിന്നിരുന്നത്‌. ഇതര രാഷ്‌ട്രീയ പാര്‍ട്ടികളേക്കാള്‍ മോശപ്പെട്ട പ്രവര്‍ത്തനം കാഴ്‌ചവച്ചു എന്ന കാരണത്താലല്ല അകല്‍ച്ച. പ്രവര്‍ത്തനങ്ങളില്‍ ഒട്ടൊക്കെ മികവും താരതമ്യേന അടുത്ത കാലം വരെ അഴിമതിയില്‍ കുറവും പുലര്‍ത്തിയിരുന്ന കമ്യൂണിസ്റ്റുകളെ മുസ്‌ലിംസമുദായം നിരാകരിച്ചത്‌ വിശ്വാസത്തിന്റെ രംഗത്തുള്ള അന്തരം തന്നെയാണ്‌. ഈ തിരിച്ചറിവും അടുത്ത കാലത്ത്‌ പുറത്തുവന്നു. മുസ്‌ലിം ക്രൈസ്‌താവാദി മതന്യൂപക്ഷങ്ങളെ പാര്‍ട്ടിയോടടുപ്പിക്കാന്‍ ശ്രമിക്കേണമെന്ന്‌ ഇക്കഴിഞ്ഞ സംസ്ഥാന സമ്മേളനത്തിന്റെ നിര്‍ദേശങ്ങളിലൊന്നായി സി പി എം പുറത്തുവിട്ടിരിക്കയാണ്‌. വൈരുധ്യാധിഷ്‌ഠിത ഭൗതികവാദത്തിലൂടെ, തോക്കിന്‍കുഴല്‍ ഭരണത്തിലൂടെ ലഭിക്കാവുന്ന വിവേചനമല്ല യേശുക്രിസ്‌തുവും മുഹമ്മദ്‌ നബിയും മറ്റു പ്രവാചകരും ഈ ലോകത്ത്‌ അവതരിപ്പിച്ചത്‌. മറിച്ച്‌ വിശ്വാസത്തിലധിഷ്‌ഠിതമായ ആത്മീയവും മാനസികവുമായ ആത്യന്തിക വിമോചനത്തിന്റെ പാതയാണത്‌ എന്ന തിരിച്ചറിവോടു കൂടി രാഷ്‌ട്രീയക്കാരില്‍ ഉണ്ടാവണമെന്ന്‌ ഉണര്‍ത്തുന്നു. സമുദായത്തിലെ ഒറ്റപ്പെട്ട സ്‌ഖലിതങ്ങളുടെ പേരില്‍ ഭത്സിക്കല്‍ നിര്‍ത്തി ആദര്‍ശത്തനിമ തിരിച്ചറിയുകയാണ്‌ വേണ്ടത്‌ എന്ന്‌ കൂടി ഉണര്‍ത്തട്ടെ.

കടപ്പാട് :ശബാബ് വരിക 02-2012

___ഏടുകളില്‍ .._________ _____________________________